عندما احتاجت الينا جارتنا

من يوميات انسان غلبان مطحون ( الحلقه 7 )

ذات يوم قررت البقاء بالمنزل وعدم الخروج ليلاً كعادتي ، ولكن واجهتني مشكله وهي أني لا أعرف كيف أقضي الوقت بالمنزل ،، حاولت ان اتحدث انا وزوجتي واذكرها بآيام مضت وذكريات جميله ولكنها آبت وقالت : ( انت اصلك فاضي وانا عندي غسيل وبص بقى اما تعمل حاجه تنفع أو تسكت ومتعطلنيش ) ، طبعاً رد مقنع جداً ،، حاولت تشغيل التلفزيون وجدت نفسي بين أمرين أما قنوات خليعه أو أخرى بها أمور اتفه من التفاهه وأما قنوات إخبارية وطبعاً الجميع يعلم الاخبار المحيطه بنا في انحاء العالم والتي من شأنها أن تصيب الانسان بالإكتئاب المذمن وأنا شخصياً تعبت من كثرة إصابيتي به . أخيراً تذكرت أن أختي قد أهدت الي كتاب ولم أقرأه حتى الآن فقررت أن أقوم لأقرأ الكتاب ولكن قطع تفكيري صوت جرس الباب ، فتحت الباب فوجدتها جارتنا والتي لا نسمع عنها شيئاً لأنها وكما يصفها الجميع ( في حالها ) قلت لها : تفضلي ياأم علي خيراً ان شاء الله

قالت لي : الحقني يا استاذ ابني علي قبضوا عليه امبارح باليل وانا النهارده طول النهار بدور عليه في كل اقسام البوليس ومش لاقياه ومش عارفه عنه أي حاجه ،

قلت لها اهدي طيب ، ماله علي ده حتى ولد كويس ومحدش بيسمع عنه حاجه وحشه هو عمل ايه ؟ ؟ ؟ قالت : والله يا استاذ ما نعرف ده حتى علي محدش شاف عليه حاجه وحشه ده حتى مش بيسيب الجامع .

قاطعتاها وقلت لها : اه اه فهمت يعني بيسرق الشباشب من الجوامع علشان كده قبضوا عليه ، قالت : لأ شباشب ايه ابني عمره ما يعمل كده ، قلت لها : طيب ركزي شويه يمكن يبيع الشباشب قبل ما يجي البيت ولا أقولك يمكن بيبيع سبح وكتب امام الجوامع وطبعاً شرطة المرافق قبضت عليه .

قالت بحزن : انا معرفش حاجه انا جيت لك علشان تكلم حد من معارفك وتعرف لي ابني فين وتطمني عليه .

قلت لها طيب اهدئي وجلست افكر حد من معارفي حد من معارفي طبعاً في هذه الاثناء قامت زوجتي بالقيام بالواجب خرجت من المطبخ وأحضرت عصير لجارتنا واستأذنت منها لاستكمال وصلة الغسيل ، أخيراً تذكرت كان لي زميل كان معي في ثانوي وهو الآن ضابط بأحدى الجهات الامنيه (( طبعاً لا اخفيكم قولاً انا أكره الضاط عموماً وخصوصاً ضباط الجهاتع الأمنيه )) ولكن لأجل هذه السيده المسكينه وأبنها قررت أن اضغط على نفسي واتصل به ، فقد قابلني يوماً وأعطاني رقم هاتفه الخاص .

اتصلت بزميلي قلت له السلام عليكم كيف حالك…. انا صديقك…… ، قال لي خير أي خدمه قلت له : حاجه بسيطه في واحد جارنا اتقبض عليه امبارح من البيت وهو ولد كويس ومش عارفين السبب انها اتقبض عليه ولا هو موجود فين ، قال اسمه ايه قلت له اسمه ،، تغيرت نبرة صوته وقال لي : انت تعرف الولد ده منين ، قلت له ده مجرد جار لي خير هو فيه ايه ، قال : الولد ده هو واصحابه مش هيجيبوها لبر دول مش مبطلين مشاكل ع النت وكمان بيعقدوا اجتماعات بالمساجد و من الآخر عايزين يقلبوا نظام الحكم ويستولو على السلطه ،،

رديت عليه بكل سخريه : اه هيقلبوا نظام الحكم م على النت ويستولو على السلطه اللعبع دي شبكه ولا اونلاين ، رد عليا : شبكه ايه واونلاين ازاي ،، مش حضرتك بتتكلم عن لعبة كمبيوتر هدفها في آخر اللعبه الاستيلاء على السلطه وكده ، رد بعضب شديد : انت بتتصل تهزر معايا ، انت ايه علاقتك بالعيال دول بالظبط ، انت بتشاركهم في افكارهم الهدامه دي ، ولا بتحضر معاهم اجتماعات ها ،، رديت بسرعه : لأ يابشا انا بهزر معاك بس أم الواد صعبت عليا قلت اكلمك ده انا اصلاً مشفتش الولد ده من يوم ما كان في 3 اعدادي ، ده م البيت للشغل وحتى مش بخرج باليل ولا حاجه

قال بغطرسه شديده : اه كنت احسب غير كده عموماً خليك في حالك زي امثالك من المواطنيين الصالحين وملكش دعوه بحاجه و م الآخر موضوع الولد ده وزملائه مش في أيدي الموضوع أكبر مني ، وكفايا كده انا عندي شغل مع السلامه .

طبعاً انهيت الحوار وأنا في قمة الاستغراب والدهشة ولم يفيقني إلا مشهد أم على والتي كاد قلبها ينفطر وانا اتحدث في الهاتف وقبل أن تسألني قلت لها : يااااااه يا ام علي انتي مكبره الموضوع قوي ما فيش حاجه ياست دول شوية تحريات وهيخرج بكره ولا بعده ومافيش حاجه خالص ،، اطمأنت الأم قليلاً من كلامي وقالت : كتر خيرك يا استاذ ربنا ما يوقعك في زنقه . وأنصرفت في هدوء إلى منزلها

انصرفت وتركتني لأضرب الف كف على كف ، على واصحابه هيقلبوا نظام الحكم وكمان الوحشين هيستولو على السلطه ، هو قصده السلطه الحكم ولا السلطه التي بتتاكل مع الرز ، طيب الاجتماعات الي في المساجد دي مش هما برده بيقعدوا يحفظوا قرآن ولا بيمسكوا المصاحف ويتكلموا في حاجات تانيه ، واي علاقة النت بالمشاكل وايه علاقة الكمبيوتر بقلب النظام ، وهو الي يسكت ويعمل مش شايف هو ده المواطن الصالح ،، يااااااااااااه مش قادر اركز ، مش فاهم حاجه ، جالي صداع من التفكير .

** علشان كده الحاله الامنيه في تدهور ، والمرور زي الزفت ، وحالات التحرش بتزيد ، والسرقه والنصب مفيش حاجه توقفهم ، وفي جهات اجنبيه وايدي خفيه بتلعب في البلد ومحدش موقفهم عند حدهم ، ونسبة الأدمان في ارتفاع وكذلك نسبة العنف ، والجرائم اللاخلاقية في تزايد مستمر .

طبعاً لازم يحصل كل ده طالما الجهات الامنيه شغلها نفسها بحاجات تافهه ، وشوية شباب هيقلبوا نظام الحكم وحرب من ع النت واستيلاء على السلطه ( بشد اللام ) ،،

هو ده التفسير الوحيد الذي ممكن أن يقتنع به أي عقل . أما بالنسبة لعلي واصدقائه فقد أفرج عنهم بعدها بيومين بعد تحقيقات مكثفه ، ولم أكذب على أم علي فيما وعدتها به .

ملحوظه

سلسلة يوميات انسان غلبان مطحون ، سلسه خياليه تماماً ، ولكنها تمس واقعنا الذي نعيش فيه