من يوميات إنسان غلبان مطحون (5)

طبعاً من غير ما احكي كلكم عارفين رمضان لما يجيي مع الحر ويا حلاوته مع ارتفاع الاسعار ( شيء مش عاوز وصف ) المهم كل ده مش مشكله ، إنما المشكله إنك لما ترجع البيت تعبان وزهقان ( صايم طبعاً ) وبعد معركه شرسه في المواصلات  تلاقي زوجتك المصونه * الحمل الوديع *  تُكشر عن انيابها لك مطالبة بتنفيذ أوامرها .

وكان الحوار عند دخولي المنزل  كالآتي :

ياااااااااه ياساتر يارب إيه الحر ده – السلام عليكم : لم ترد زوجتي ، كررت : السلام عليكم ،  ردت بصوت منخفض وحزين ( وعليكم السلام ورحمة الله وبركاته )

قلت في نفسي ( يارب استر الهانم شكلها مخنوقه وشكله هيبقى يوم ياواد اعصر على نفسك لمونه وحاول تشوف فيها إيه ) *قلت انا بقمة البرود * : مالك يا حبيبتي حد زعلك ، قالت : لأ مفيش حاجه ولو سمحت سيبني في حالي ،

( هعصر على نفسي لمونه تانيه ) ، اسيب القمر في حاله هو ده كلام مالك ياجميل ؟

إحنا اتعزمنا كام مره في رمضان ؟ رديت : ثلاث مرات ، طيب إحنا عزمنا حد قبل كده ؟ رديت : لأ ، خلاص طالما لأ يبقى نعمل عزومه زينا زي باقي الناس علشان شكلنا بقى وحش قوي ، رديت عليها بصوت مرتفع : هو علشان شكلنا ما يبقاش وحش تقومي تخربي بيتنا ، خرجت زوجتي من هدوئها وقالت : بقولك إيه لازم نعمل العزومه ولو معملنهاش مش هيحصل طيب و انت عارف الباقي .

ومع إصرارها وعملاً بالحديث من فطر صائماً وكمان دي اول مره تطلب شيء وتصر عليه وافقت على العزومه بس اشترطت شروط طبعاً خاصه بالعدد واصناف الطعام .

وكمان علشان مزعلهاش تركت لها مبلغ محترم وتركت لها حرية التصرف بعد أن وصيتها ( بعدم خراب بيتنا ) .

وجاء يوم العزومه .

وقبل الإفطار بنصف ساعه وجدت الوفود تأتي على منزلنا الوفد يلي الآخر ، وهنا عرفت اني قد وقعت في مقلب ولكني صبرت نفسي لعلها تكون قد اقتصدت في الطعام ولكن عند وضع مائدة الإفطار تأكد أنه مقلب حقيقي وحينها وضعت يدي على رأسي من شدة التعب وناديتها وقلت ( هي دي الوصيه الي انا وصيتك بيها ) قالت : دي فرصه ومش هتتعوض وانا بصراحه مش ضمناك تعملها تاني  ، قلت لها : حاضر

وعند الإفطار قلت : اللهم إني لك صمت وعلى رزقك افطرت ومن زوجتي تبرأت ومن هذه العزومة تبت